Lýsing:
Auðnutittlingur er smávaxin finka, rákótt og grábrún með stutt stél.  Ennisfjaðrir eru rauðleitar á fullorðnum fuglum og gjarnan er áberandi rauða slikja á bringu.  Hann lifir norðarlega í Norður-Ameríku og Evrópu.

Auðnutittlingur flýgur í léttum bylgjum. Hann er kvikur og fimur þegar hann leitar sér ætis í trjám og öðrum gróðri.

Er oftast í litlum hópum utan varptíma en þeir geta þó orðið allstórir.

Fæða:
Hryggleysingjar yfir varptímann en lifir annars á fræjum, helst birkifræjum. Kemur í fuglafóður og er sólginn í sólblómafræ.

Kjörlendi:
Ræktað skóglendi,  birkiskógar, kjarr og garðar

Fræðiheiti:
Carduelis flammea. En á Íslandi er undirtegundin Carduelis flammea islandica og á Grænlandi og Baffineyju er undirtegundin Carduelis flammea rostrata.

Lengd: 12-14 cm

Þyngd: 15 g.

Vænghaf: 20-25 cm

 

Varp og ungatímabil

Hreiðrið gerir hann í trjám og runnum.  Það er lítil, vönduð karfa úr sinu og öðrum gróðri, fóðruð með hárum og fiðri

Verpur venjulega oftar en einu sinni á sumri

Varptímabil: Fyrri hluti maí og fram í byrjun júlí.

Fjöldi eggja: 4-6

Liggur á: 10-12 daga

Ungatími: 10-14 dagar

Dvalartími á Íslandi: Hann er hér allt árið